ސަރުކާރުގެ ގިނަ އޮފީސްތަކެއް ހިންގަމުން އަންނަ ވެލާނާގެ " ތެނެދޫ ވެލާނާގޭ" ގެ ނަމަށް ބަދަލުކުރުމަށް ތިނަދޫ ކައުންސިލުން އިންތިގާލީ އިންސާފުގެ އޮފީހަށް ހުށައަޅައިފި އެވެ.

ތިނަދޫ ކައުންސިލުން މި މައްސަލަ ހުށައަޅާފައި ވަނީ 1962 ވަނަ އަހަރު ތިނަދޫއިން މީހުން ބޭލުމާ ގުޅިގެން ލިބުނު ގެއްލުންތަކުގެ ބަދަލަށް ދިވެހި ދައުލަތުން ތިނަދޫ ރައްޔިތުންގެ ކިބައިން މަޢާފަށް އެދުމަށާއި އަދި އެހެންވެސް ކަންތައްތަކެއްގެ ބަދަލުގައި ކަމަށް އެ ހުށަހެޅުމުގަައި ބުނެފައިވެ އެވެ.

އެގޮތުން ތިނަދޫ ކައުންސިލުގެ 4 ވަނަ ދައުރުގެ 2 ވަނަ ކުއްލި ބައްދަލުވުމުގައި ހުރިހާ ކައުންސިލް މެމްބަރުން މި މައްސަލައަށް އާބަސް ކިޔާފައިވާއިރު، އެބޭފުޅުން ވަނީ މި މައްސަލަ ހުށައެޅުމުގެ އެންމެ ބޮޑު ބޭނުމަކީ އިބްރާހިމް ނާސިރު ގެ ވެރިކަމުގައި ތިނަދޫ ރައްޔިތުންނަށް ލިބުނު ގެއްލުންތަކުގެ ބަދަލު ހޯދައި އިންސާފް ގާއިމް ކުރުން ކަމަށް ވިދާޅުވެފައެވެ.

މީގެ އިތުރުން ވެސް ތިނަދޫގެ ރައްޔިތުންގެ ހައްގު ހޯދާދިނުމަށް މި މައްސަލާގައި އިތުރު ކަންތައްތަކެއް ވެސް ވަނީ ހުށައަޅާފައެވެ. އެގޮތުން ތިނަދޫއިން މީހުން ބޭލި މައްސަލަ ތަހުގީގު ކޮށްދިނުމަށާއި، ތިނަދޫ ރައްޔިތުންގެ ކިބައިން ނިގުޅައިގަނެވިފައިވާ އިންސާނީ ހައްގުތައް ހޯދާ ދިނުމަށާއި ތިނަދޫގައި ކުރެވުނު "ޤަތުލުޢާންމު"ގައި ބައިވެރިވި ފަރާތްތަކުގެ މުދަލާއި ބިމުން 50 އިންސައްތަ ފައިދާ ދާއިމީ ގޮތެއްގައި ތިނަދޫ ރައްޔިތުންނަށް ހޯދާދިނުމަށް ވަނީ ހުށައަޅާފައެވެ.

މިމައްސަލާގައި ތިނަދޫއިން ގެއްލިފައިވާ މުއްސަނދިކަން އާރޯކުރުމަށް 100 އަހަރުގެ ތަރައްޤީގެ ޕްލޭންއެއް އެކުލަވާލުމަށްވެސް ވަނީ ހުށައަޅާފައެވެ.