ރާބިޠަތުލް ޢާލަމިލް އިސްލާމީ އާއި ރައީސް ޑރ މުޙައްމަދު މުޢިއްޒުގެ ސަރުކާރުގެ އިސްލާމީ ތަޞައްވުރު އިސްލމީ ކަންކަމާއި ބެހޭ ވަޒީރު ޑރ މުޙައްމަދު ޝަޙީމް ޢަލީ ސަޢީދު ހިއްސާކުރައްވައިފިއެވެ.
ވަޒީރު ޑރ ޝަހީމް އެވާހަކަތައް ހިއްސާކުރައްވައިފައިވަނީ މުސްލިމު ވޯލްޑް ލީގް ގެ (ރާބިޠަތުލްޢާލަމިލްއިސްލާމީ) ޑެޕިއުޓީ ސެކްރެޓަރީ ޖެނެރަލް ޑރ. ޢަބްދުއްރަޙްމާން ބިން ޢަބްދު ﷲ ޒައިދު އާއި ބައްދަލުކުރައްވި ބައްދަލުކުރެއްވުމުގައެވެ.
އިސްލާމީ ކަންތައްތަކާއި ބެހޭ ވަޒީރު ޑރ ޝަހީމް ވަނީ ރާބިޠާއާއި ރާއްޖެއާ ދެމެދު ގުޅުން އިތުރަށް ވަރުގަދަކޮށް، މި ވުޒާރާއާއި ރާބިތާއާ ދެމެދު 2012-2015 އަށް ސޮއިކޮށްފައިވާ ތިން އެއްބަސްވުމަށް އަމަލުކުރަން ފަށައި، ރާއްޖޭގައި ރާބިޠާގެ އޮފީސް އަލުން އިޢާދަކޮށް، ރާއްޖޭގެ އިސްލާމީ ފަތުވާ ކައުންސިލް ތަރައްޤީކުރުމުގައި ރާބިޠާގެ އިސްލާމީ ފިޤުހު އެކަޑަމީގެ އެހީތެރިކަން ހޯދުމާމެދު ވެސް މަޝްވަރާކުރެއްވިއެވެ.
މިބައްދަލުވުމުގައި ރާއްޖޭގެ އިސްލާމީ ކަންތައްތަކާއި ބެހޭ ވުޒާރާ އާއި ސައުދީގައި ހުންނަ ރާއްޖޭގެ އެމްބަސީގެ އޮފިޝަލުން ބައިވެރިވެޑައިގެންނެވިއެވެ.
މި ބައްދަލުވުން އޮތީ މައްކާގައި ހުންނަ ރާބިޠާގެ ހެޑް އޮފީހުގައި މިއަދު ހެނދުނު އެވެ.
